Удмурт блог

Ортчиз Udmurt Antiparty “Кебит Возьмась Awards”

19 толшоре «Пепелац» клубын ортчиз Udmurt Antiparty “Кебит Возьмась Awards”. Позыръяськонлэн вал туж тунсыко программаеӟ Порозмафи но Александр Бикузин куальтресгес пичильтык-шоуын “Пошолтоннахербикузин!”, кудаз наградить каризы Антидунъет куарасётонын тужгес но трос асьсэлэн номинациязы куара люкамъёсты. Жаляса верано, тросэз «вормисьёс» ӧз лыктэ басьтыны кузьымзэс.
Эшшо программаын вал удмурт интернетысь удмурт скандальной Чичпотон.ру блогъя тужгес но скандальноесь крезьгур проектъёс удмурт скандальной Чичпотон.ру блогъя: Уллапалла Бой, Лаврентий, диджей Пельмэн. Шулдыртӥзы ик соос калыкез! Но кыӵе удмурт пати Электроникъёстэк но Эркишевтэк, нош таяз позыръяськонын Шаркан хитъёсын шумпоттӥз на dj Джи Ай Эм Порозмафиысь.

Подробнее

Пичи кенеше чиновникъёсты гинэ

18 толшоре Госсоветлэн залаз ортчиз Пичи Кенеш. Вал 2011 арлы йылпумъянъёс лэсьтэмын но 2012 арлы быдэстоно ужъёс пуктэмын.

Эскериськизы тужгес но кулэлыкоесь юанъёс: Н.Н. Мусалимовлэн тӧроын кыленэз, огазеяськонын деполитизаци, Калык Фронтысь потон, удмурт калыклы вазиськон но Удмурт кенешлэн вуоно ӧтчамез ласянь решение кутон. Кенешчиослэн трос дэмланъёссы кутэмын ӧй вал: залын кенеш ёзчиос пӧлын тросез чиновникъёс бере, соос кышказы асьсэлэсь пукон интыосэс ыштэмзылэсь.Н.Н. Мусалимов быдэстэм ужъя отчет дасяз но 13 езчиос версаськизы: И.М. Викторов, В.А. Осипов, П.П. Бобров, Л.Е. Городских, Н.А. Степанова, В.М.Билых, Л.М. Гонин, Ю.К. Рожин, Ю.С. Саитов, Л.Ф. Иванова, В.К. Тубылов, А.А. Комаров, О.К. Шилова но Елена Минигараева.
Таиз Пичи Кенеш, азвылъёсыныз ӵошатыса, аспортэмлыко вал соин: Пичи Кенеше ӧз лэзе пырыны троссэ удмурт активистъёсты. Госсовет юртэ пырон азьын 3 кузя полицысь возьмаськисьёс пуктэмын вал, кудъёсыз адямиосты  списокъя гинэ лэзьязы.

Мария Золотарёва

«Зарни вотэс» ӵошатскон: йылпумъянъёс

9 толсуре тодмо луиз «Зарни вотэс» удмурт егитъёслэн сайтъёсылэн ӵошатсконлэн йылпумъянъёсыз. Йылпумъянъёс ортчизы Эшъяськон юртын, отысь конференц-залын вотэсбам кылдытӥсьёс адӟизы ог-огзэс, быгатӥзы вераськыны ог-огенызы компьютер пыр сяна зэмос улонын.
«Зарни вотэс – 2011» ӵошатсконэз ортчыто Удмурт Республикаысь тодон-валан сётон удысын ужасьёслэсь быгатонлыксэс будэтонъя но выльдонъя институт» удысужын ватсаса тодон-валан сётонъя аскивалтӥсь дышетон ужъюрт Удмурт Республикаысь йӧскалык политикая министерствоен ӵош, туж бадӟым юрттэт сётэ М.А. Кастрен нимо огазеяськон (Хельсинки).
ӵошатсконэ быгатӥзы пыриськыны егитъёс (14—35 арес). Финалэ вуизы 32 номинантъёс, заявкаос вал тросгес ке но сётэмын, но ваньмыз финалэ потыны ӧз быгатэ. ӵошатскон ортчиз таӵе номинациосын: “Удмурт блог”, “Шаер тодонъя сайт” но “Усточисолэн сайтсы”, но берлоге сини соос борды вал ватсамын ньылетӥез - “Кыл но кылос”.
Ужрадлэн официальной люкетэз кутскиз «Зарни вотэс» проектлэн кивалтӥсьлэн Людмила Геннадьевна Мустаевалэн кылъёсыныӟ «Та ӵошатсконмес ортчытоно луим бергес, малы ке шуоно улонысь кошкиз проектлэн кивалтӥсез Алексей Геннадьевич Красильников. Вал кылдэмын трос шуг-секытъёс, соин та ӵошатсконэн тунсыкъяськытыны егитъёсты кутскимы куарусён толэзе гинэ. Проектъёсты ӵошатсконлы ӵектыно вал 4 пӧсьтолэзьысен 21 коньывуонозь. Дыр ортчиз нош ӵошатсконэ пыриськисьёс чиньыен лыдъямон гинэ вал – ми туж паймим но ӝожомим, соин ӵошатсконэз 1 толсурозь кыстоно луим. Кызьы но озьы ӵектэм вотэсбамъёслэн лыдзы будӥз, но со туж шумпоттэ, малы ке шуоно та ӵошатсконлэн нырысетӥ ужпумез - егитъёсты удмурт вотэсбамъёсын тунсыкъяськытон, мед интернетын луоз асьме калыкмылы кулэлыко луись бамъёс».
ӵошатсконлэн Положениезъя номинантъёсты эскериз жюри. Соос профессионал синмын, рос-прос учкемзы бере бырйизы “Зарни вотэс” ӵошатсконлэсь вормисьёссэ:
1 инты «Дарт» газет (udmdunne.ru)
2 инты Дмитрий Антонов «Инвожо» журнал (invozho.ru) но «Гожъяськы шонер» (udmspell.ru)
3 инты Ирина Евдокимова «Владимир Романовлы сӥзеем виртуальной музей» (irinaewdo.narod2.ru), Ксения Ворончихина «Чимали-горд йырсиё нылашлэн блогез» (chimali.ru) но Владимир Вахрушев но Евгения Сундукова «Нежало шаере» (http://krayeved.blogspot.com).
Со сяна Йӧскалык политикалэсь но Эшъяськон юртлэсь кузьымзэ басьтӥз Алена Петрова (Дарали Лели) «Шулдыр ӝыт» (http://shuldyr-jyt.blogspot.com) но Дарали (http://daralileli.blogspot.com), нош Дышетсконъя но наукая ёзэтлэсь кузьымзэ басьтӥз Ирина Евдокимова «Владимир Романовлы сӥзеем виртуальной музей» (irinaewdo.narod2.ru), озьы ик нимысьтыз кузьмен вал пусъемын Наталья Образцова но Анна Семенова «Воршуд» ( http://vorshud.unatlib.org.ru) вотэсбам понна.
Вормемъёс басьтӥзы дуно призъёсты, ӵошатсконе пырисьёс вал пусъемын нимысьтыз грамотаосын но синпель кузьымъёсын. Йылпумъяз ужрадэз кылбуреныз но кырӟаменыз Богдан Анфиногенов, кудӥз удмурт егитъёс пӧлын тодмо луиз вотэсбам юртэмен.
«Зарни вотэс - 2011» йылпумъяськиз, но вотэсбамъёс, кудъёсыз вал кылдытэмын кылизы. Оскисько, вотэсбамъёслэн лыдӟы будоз шуыса, но соос быдэсак удмурт кылын луозы (туала бамъёс тросэз ӧвӧл на чылкак удмурт кылын). Котькудӥз аспортэмлыко, портэм удысъёсъёсты усьтэ, но со сяна соос кулэ удмурт кылэз но лулчеберетэз утён но егитъёс пӧлы вӧлмытон бордын ужаны. Удмурт вотэсбамъёс туж ичи но соос туж кулэ. Эн возьдаське асьтэлэсь малпанъёстэс шараяны, кылдытэ блог, но кин тодэ оло Тӥ вуоно аре «Зарни вотэс-2012» ӵошатсконлэн вормисез луоды.

Мария Золотарёва

Зарни вотэс - 2011. Кин вормоз?

1 толсуре 2011 аре удмурт егитъёслэн сайтъёссылэн “Зарни вотэс – 2011″ ӵошатсконазы пыриськыны сётэм заявкаосты эскеремысь радъянкомитет дугдӥз ни. Вылӥ верам нуналлэсь бергес вуэм куронъёс (таӵеесь вал, жаляса верано луиськом) санэ басьтэмын ӧй вал.

Ӵошатсконлэн номинантъёсыз ӧжыт ӧвӧл – 32 вотэс-проект. Куронъёс талэсь тросгес ик сётэмын вал, но соос пӧлысь ваньмыз ӧвӧл быгатӥллям ӵошатсконлэн пумозяз вуыны. Радъян комитет пуктэмъя, ӵошатсконантъёслэсь мылкыдзэс лыдэ басьтыса но, куинь номинациос борды ватсамын вал на ньылетӥез: али “Удмурт блог”, “Шаер тодонъя сайт” но “Усточисолэн сайтсы” шуыса нимам номинациос борды ватсаськиз на “Кыл но кылос”.

Подробнее

3-тӥ финн-угор калыккуспо мер-экономи форум туэ уз ортчытӥськы.

Кенешонын, кудӥз ортчиз 25 шуркынмонэ, вал кутэмын решение: Кудымкарын форум уз ортчы шуыса, со понна вань туж трос мугъёс. Форум ортчыны кулэ вал 1-3 толсуре . «Сокращение vs глобализация в современном мире» темая. «Вождэс эн поттэ ваем шуг-секытъёс понна, малпаськом азьланяз тӥледын пайдалыко ужаны кылдоз шуыса.» - вазиськизы форуме пыриськиськыны мылкыд карисьёслы ортчытӥсьёсыз.

Мария Золотарёва

Туннэ, 1 шуркынмонэ, ялизы литературая Эстон чыжы-выжы калыкъёслы программая премиез вормисьёсты.

Туннэ, 1 шуркынмонэ, ялизы литературая Эстон чыжы-выжы калыкъёслы программая премиез вормисьёсты. Та премия арлы быдэ сётиське быдзым удмурт кылбурасез - Кузебай Гердэз, кудиз вал ыбемын 1 шуркынмонэ 1937 аре, тодэ вайыса.
Эрико жюри, кудаз пыризы Эстон чыжы-выжы калыкъёслы программаысь но финн-угор литературая огазеяськонысь ёзчиос, ясанэм кутиз художественной мадьбуро произведениос полысь премиез пор гожъяськисьлы Михаил Павловлы «Четлык ÿжака» (Силуэт решетки) сборникез понна сётыны.
Кылбуран удысын премия сетизы удмурт кылбурасьлы Екатерина Макаровалы «Шöдон» (Интуиция) сборникез понна.
Берыктэм литература удысын премиен вал пусъемын саам берыктись Екатерина Мечкина, Светлана Заборщиковалэсь «Ēллем вуэзь. Кāхце сāмь нызнэ Куэлнэг нёаркэсьт ēлльетъ» (Кольской шаерысь саам кышномуртъёслэн адзонзы) сборниксэ берыктэмез понна.
Нылпиослы гожъям понна премия басьтиз коми-пермяк Василий Козлов «Локтас тулыс» (Тулыс лыктоз) пиналъёслы книгаез понна.
Литературатодон удысын но драматической жанръёсын гожтэм понна таяз аре премия оз сётиськы.

28 коньывуонэ «Грифон» галереяын ортчиз Кузебай Гердлы сизем лыдӟон.

28 коньывуонэ «Грифон» галереяын ортчиз Кузебай Гердлы сизем лыдӟон. Кузебай Гердлэн творчествоез сярысь мадӥз удмурт критик но литературовед А.Г. Шкляев.
Асьсэлэсь ӟуч но удмурт кылбуръёссэс лыдӟизы егит гожъяськисьёс: Дмитрий Глухов, Анатолий Галиханов, Наталья Клабукова, Оксана Краснобородина, Ольга Тронина, Руслан Муратов, Андрей Гоголев.
Озьы ик, туж бадӟым ивор: «Удмурт дунне», «Грифон» галерея, «Удмуртлык», «Лулчеберет контекст шорин» гожтӥзы валчеужаны чектӥсь мемарандум. Гожтэм кагаз меретэз: валче проектъёс бордын ужан, ӟуч но удмурт лулчеберетэн воштиськон, егитъёсты азинтон.
Та лыдзонъёсын Кузебай Гердлы сизем ужрадъёс уг йылпумъясько. 1 шуркынмонэ 19 часын Кузебай Гердлэн Ижевскысь синпелетэз возын ортчоз пумиськон быдзым удмурт гожъяськисьлэсь ужъёссэ, кылбуръёссэ тодэ вайыса. Вань мылкыд карисьёсты возьмаськом!
                                                                                                                      Мария Золотарёва

Григорей Славилэн возьматон

14 коньывуонэ Кузебай Герд нимо музейын 17.00 часын Вячеслав Михайловлэн (Григорей Слави) суредъёсыныз возьматон усьтӥськоз. В. Михайлов удмурт суредаськись. Ужъёсыз висъясько туала но туж аспӧртэмлыко луэменызы

Выль блог: Ческыт мед кошкоз!

Быдэс дуннеысь рецептъёсын сиён-юон блог. Нырысьсэ удмурт кылын! Лэсьтэмын Удмртиын.
Ми шумпотомы тӥляд сиён-юон лэсьтон рецептъёстылы но малпанъёстылы. Гожтэтъёстэс ыстыны быгатоды таӵе адресъя cheskyt@mail.ru

Выль удмурт блогъёс кылдытэмын

Берпуметӥ кык арня куспын Удмурт Филологи Факультетысь студентъёс 10 пала выль блогъёс кылдытӥзы. Табере чаклалэ выль сайтъёссылэсь усьтӥськемзэс. http://friendfeed.com/udmurt